Sereno midayeg sa sayaw sa dancing inmates

CEBU, Philippines - Nahinangop kaayo si Supreme Court   Chief Justice Ma. Lourdes Sereno sa presentasyon sa mga piniriso sa Sugbo sa ilang sayaw nga nakapahimo kanilang inila sa tibuok kalibotan isip dancing inmates.

Kini atol sa iyang pagduaw   uban ang mga huwes sa Sugbo ug sa nasud sa Cebu Provincial Detention and Rehabilitation Center (CPDRC) sa ilang paglusad sa Justice on Wheels sa miaging adlaw.

Matud pa ni Sereno nga talentado ang mga binilanggo sa CPDRC ug nakahatag og kalipay dili lamang dinhi sa nasud kung dili sa tibuok kalibutan.

Uban kang   Sereno nga miduaw sa CPDRC mao ang chairman sa Justice on Wheels nga si Justice Mariano Del Castillo, Supreme Court Administrator Jose Maidas Marquez, Former Associate Justice Adolfo Azcuna, Court of Appeals Justice Geraldine Faith Ycong, mga huwes sa nasud nga Nepal ug uban pa.

Gumikan kay bisan siya nalingaw usab kaayo sa performance sa pagsayaw sa mga piniriso, mipasalig si Sereno nga tabangan niya kini nga mapadali ang pagpaminaw sa ilang mga kaso sa korte aron ikapakanaog dayon ang desisyon kanila sa hukmanan.

Ang gilusad nga Justice on Wheels maoy usa sa hagdanan aron mapadali ang paghusay sa mga nagtipun-og nga mga kaso sa nagkadaiyang hukmanan sa nasud.( /WC)  (BANAT NEWS)