Joavan may utang pa hinungdan nga wa pautanga

CEBU, Philippines - May utang pa   si Joavan Fernandez nga P20,000 sa iyang suki nga utanganan nga maoy hinungdan nga wala kini pahuwama og kuwarta niini busa nanghagis kini   niadtong Miyerkules sa gabii.

Mao kini gibutyag ni Ignacio Enjambre, 60, nga taga Poblacion, dakbayan sa Talisay   kinsa nagpa-blotter sa maong insidente ngadto sa Talisay City Police Station.

Si Enjambre mibutyag sa mga tigbalita kalabot sa paghiwasa ni Joavan sa kasuko nga wala niya pahuwama og kwarta tungod kay may bayranan pa kini nga P20,000 nga iyang giutang   mga duha na ka semana ang milabay.

Matud pa niya nga sa wala pa mohiwasa sa kasuko sa Joavan, mihangyo kini nga moutang og P10,000, apan tungod kay napakyas, matud pa nagbagutbot ang anak ni Mayor Socrates Fernandez ug samtang naglakaw giingong mipasalba sa iyang armas de fuego dayong sakay sa iyang CRV-SUV nga kolor puti ug mipasirit sa pagpadagan pahilayo sa maong lugar.

Gumikan sa kalisang sa mga molupyo sa maong lugar nga manghasi na usab si Joavan human sa duha ka tuig nga pagpakahilom niini bunga sa pagtambag kaniya ni Sr. Supt. Ramon Melvin Buenafe, hepe sa kapolisan sa dakbayan sa Sugbo, misumbong sa kapolisan ang mga silingan ni Enjambre.

Hinuon matud pa ni Enjambre nga gisaaran siya ni Mayor Fernandez nga bayran niini ang P20 mil nga utang ni Joavan kaniya.

Samtang ang Banat News misuway og tawag kang Joavan kagahapon sa hapon aron makuhaan og pamahayag kabahin sa pasangil batok kaniya apan wala kini motubag sa iyang cellphone.

Sa laing bahin, ang hepe sa TCPS nga si Supt. Eddie Recamara nagkanayon nga wala na maabti si Joavan sa iyang mga sakop nga miresponde sa insidente hinungdan nga gipangita nila kini ug giadto sa mga posibleng lugar nga mga adtoan niini apan wala nila masakpi.

Matud sa hepe nga kabahin sa report nga dunay gidalang armas si Joavan susihon nila kini ngadto sa Firearms Explosives Security and Guards Supervision (FESAGS) kung may record ba si Joavan nga lisensyadong pusil kay kun wala unya maaktohan nila nga magtangkil kini og pusil dili sila magpanuko sa pagsikop niini.

Samtang si Enjambre wala pa makahukom kun mokiha ba siya kang Joavan o dili. (/WC) (BANAT NEWS)