Giputos sa chorizo gihugasan lang sa Mananga

CEBU, Philippines - Ang Konseho sa dakbayan sa Talisay mopasusi kabahin sa report nga ang chorizo nga gipamaligya diha sa merkado sa siyudad giingong dili limpiyo tungod kay ang tinai sa baboy nga giputos sa karne nga gihimong chorizo anha kini hugasi sa sapa sa Mananga.

 Matud ni Konsehal Danny Caballero sa oposisyon nga niadtong Martes sa ilang milabay’ng sesyon gipadayag ni Konsehal Romeo Villarante ang maong problema.

Gibutyag ni Caballero nga si Bise Mayor Alan Bucao mimando na ngadto sa city health ug market administrator aron mopahigayon og pakisusi sa maong problema aron mopahigayon dayon og tukmang aksiyon.

Matud ni Caballero sa report nga ilang nadawat ang mga tinai sa baboy nga gitawag og “burot” nga iputos sa chorizo anha lang kini hugasan sa sapa sa Mananga diin makita nga hugaw ang tubig sa sapa ug anha pa gyud kini ihayhay daplin sa sapa diin dugokon kini og mga lagong.

Ang maong sitwasyon makahatag kini og dili maayong epekto sa panglawas sa mga konsumidor.

Gawas niini gibutyag usab ni Caballero nga kasagaran usab sa karneng baboy nga galingong himuong chorizo mga bahaw na kini nga karne ug kanang karne nga wala mahurot og kahalin karong adlawa diin pagkasunod adlaw galingon na kini timplahan ug himuong chorizo. (BANAT NEWS)