Gwen di na mag-senador

CEBU, Philippines - Gibuak na sa mga Garcia human sa pipila ka mga adlaw nga pagpakahilom ni Gov. Gwendolyn Garcia ngadto sa media dihang ang mismong amahan niini nga si Deputy Speaker Pablo Garcia mipahibalo atol sa radio interview nga dili na modagan pagkasenador ang iyang anak.

Sibaw sa mga nanggawas nga estorya nga magpapili ang gobernador sa pagka-kongresista sa ikatulong distrito nga biyaan sa iyang igsuon nga si Kong. Pablo John Garcia kinsa maoy modagan pagka-gobernador sunod eleksiyon.

Apan nagdumili pa hinuon ang duha ka managsuong Garcia sa pagluwat og pamahayag bahin niini hangtud nga ang ilang amahan nga si Deputy Speaker Pablo “Pabling” Gacia sa segundo distrito ang niluwat sa maong kompirmasyon sa DYLA kagahapon. Matud pa ni Pabling nga desisyon sa ilang pamilya nga dili na mopadayon ang gobernador sa pagka-senador.

Samtang si Bise Presidente Jejomar Binay kinsa dinhi sa Sugbo kagahapon mikompirmar nga dili na modagan ang gobernador pagka-senador ubos sa United Nationalist Alliance nga maoy gipasakopan niini.

Matud pa ni Binay nga gipahibawo na siya ni Garcia sa miaging mga adlaw kalabot sa iyang plano.

“In fairness kay Gov. Garcia at very logical naman at tama ho. Ang dahilan kasi mas kailangan siya dito sa panahon ng kampanya. Kailangan siya sa Cebu, nandoon po ang kanyang kapatid, kandidatong governor, andiyan po ang kanyang tatay at maari rin naman siya maging miyembro ng Congress,” matud pa ni Binay sa mga tigbalita.

Si Binay nangulo sa ground breaking sa Argao District Employees Housing Project sa barangay Binlod sa lungsod sa Argao kagahapon.

Giklaro ni Binay nga dili ang resulta sa survey ang nag-aghat kang Garcia sa pagsibog sa iyang tinguha.

Sa ulahing survey sa Pulse Asia niining buwana, si Garcia nahimutang sa ika-24 ngadto sa ika-29.

Matud pa ni Binay nga ang pamilyang Garcia nagkinahanglan kang Gwen (gobernador) ilabi na nga si Pablo John modagan pagka-gobernador samtang ang amahan modagan usab pagka-kongresista.

Si Garcia gikatakdang mopahibawo sa opisyal niya nga pahibawo kalabot sa maong isyu sa mosunod nga mga adlaw.

Giingong may pagtugot na si Gwen sa iyang mga kaalyado sa ikatulong distrito kung modagan kini sa pagka-kongresista lakip na ni Bokal Alex Binghay kinsa maoy nagplano sa maong posisyon.

Nunot niini, ikaatbang ni Gwen si Pinamungajan Mayor Geraldine Yapha sa pagka-kongresista kinsa nipadayag na og kaandam.  (BANAT NEWS)