Anak sa gipatay nga ex-Major maoy suspek

CEBU, Philippines - Migawas sa resulta sa gihimong paraffin test ngadto sa anak sa retiradong opisyal nga sakop sa Bureau of Management and Penology (BJMP) nga nagpositibo kini sa powder burn diin nagmatuod nga kini nagpabuto og armas.

Ang hepe sa kapolisan sa Homicide Section sa Cebu City Police Office, Sr. Insp. Jamil Mohammad Jamiri mibutyag nga base sa resulta, si Glenn Niñeza nagpabuto gyud og armas.

Kini maoy hinungdan nga ilang gipasaka ang kasong parricide batok niini. Ang amahan ni Niñeza nga si retiradong opisyal sa Bureau of Jail Management and Penology nga si Simplicio Niñeza napalgang nabulit og samad pinusilan sa kalawasan sulod sa ilang balay niadtong milabay’ng Martes sa hapon.

“Qualitative examination on paraffin cast of Glenn Opalla Niñeza gave positive results to the test for the presence of gunpowder initates on his right and left hands,” tipik sa resulta sa eksaminasyon sa paraffin test.Matud pa ni Jamiri nga gawas sa upat ka saksi nga nagpamatuod nga si Glenn diha sa panimalay atol sa pagpatay sa iyang amahan makadugang usab sa gibug-aton sa ilang isang-at nga kaso ang resulta sa gihimong paraffin test.

Gibutyag usab ni Jamiri nga ang inahan ni Glenn nga si Crecencia miduso na usab sa iyang affidavit nga nagbutyag ug nagkompirma nga aduna gyuy kahiubos ang biktima ngadto sa iyang anak tungod sa bisyo niining ilegal nga drugas.

Matud pa ni Jamiri nga base sa ‘actuations’ sa inahan susama sa nakombinsir kini nga ang anak gyud niini ang nagpatay sa iyang bana.  (BANAT NEWS)