Kiha ni Rama batok Osmeña gikuwestiyon

CEBU, Philippines - Gikuwestiyon ni Bise Mayor Joy Augustus Young ang gibuhat ni Mayor Michael Rama sa pagpasaka og kiha batok kang Kongresista Tomas Osmeña ngadto sa buhatan sa Ombudsman Visayas kalabot sa duha ka kontrobersyal nga US Dodge cars.

Suma pa ni Young nga kinahanglan nga mopasaka si Rama og reklamo pinaagi sa personal nga kapasidad ug dili dad-on ang ngalan sa kagamhanan sa siyudad.

Kahinumdoman nga nagmartsa padulong sa buhatan sa Ombudsman sa miaging adlaw ang mga supporter sa mayor isip pagpakita og suporta sa pagpasaka og reklamo batok kang Osmeña.

Lakip sa gipasakaan niya og reklamo mao ang igsoon niini nga si Maria Victoria “Minnie” Osmeña, ug ang anak niini nga si Paulo.

Apan si Rama sa iyang bahin miingon nga aduna siya’y katungod sa pagpasaka og reklamo sa gibuhat sa kongresista.

Gawas nga usa siya ka tax payer, responsibilidad usab niya isip mayor ang   pagprotiher sa siyudad.

Samtang gipanghimakak ni Rama ang migawas nga mga report nga matud pa gipahakot niya ang mga tawo nga misalmot sa martsa padulong sa buhatan sa Ombudsman.

Matud pa niya nga kabubot-on kadto sa iyang mga supporter nga miduyog sa iyang tuyo pagsang-at og kiha batok kang Osmeña.

Sa sayo pa ang kampo ni Rama nakurat dihang nakit-an nila ang maong mga Dodge   nga awto nga giingong hinatag sa Big Foot Entertainment nga sinilyohan sa siyudad nga gigamit ni Osmeña sa nagkadaiyang kalihukan nga gitambongan niini.

Apan giingong gibutang ubos sa ngalan sa iyang igsoon nga si Minnie Osmeña ug sa anak niini nga si Paulo ang maong mga sakyanan ug dili sa siyudad sa Sugbo.

(BANAT NEWS)