Joavan nagpasalba sa armas way naigo

CEBU, Philippines - Mihugpa ang kaguliyang ug kalisang sa katawhan sa barangay Poblacion, dakbayan sa Talisay kagabii dihang mipasalba sa iyang armas si Joavan Fernandez , anak ni Mayor Socrates Fernandez sa maong dakbayan gumikan matud pa nasuko nga wala pautanga og kuwarta sa usa ka loan shark sa maong lugar.

Si PO3 Romeo Caacoy sa Talisay City Police Office mibutyag sa Banat News nga human magpabuto sa iyang armas   sa mga alas 8:00 sa gabii, si Joavan misakay dayon sa iyang CRV-SUV car ug mibiya sa maong lugar nga wala hisayri kun diin paingon.

Gani human madawat sa kapolisan ang report gikan sa mga tawong naapektahan sa pagpanghasi ni Joavan, milihok dayon sila apan wala na hiabti nila ang anak sa mayor. Wala usab masuta kun nganong wala kapahuwam og kuwarta ang suki ni Joavan, apan ang iyang pagpanghasi maoy girumbo sa kapolisan nga ilang   maimbistigar. (BANAT NEWS)