CEBU, Philippines - Ang anak sa retiradong Major sa Bureau of Jail Management and Penology (BJMP) kompirmadong gitudlo ug giila nga maoy nagpusil patay sa iyang amahan niadtong Martes sa buntag sulod sa pinuy-anan niini sa Macville, Gorordo Avenue sa barangay Lahug ning dakbayan sa Sugbo.
Si Glenn Neñiza maoy anak sa namatay’ng si retired Major Simplicio Neñiza nga kanhi opisyal sa BJMP.
Ang hepe sa Homicide Section sa Cebu City Police Office nga si Sr. Insp. Jamil Mohammad Jamiri, mibutyag nga aduna sila’y duha ka saksi nga nagtumbok nga si Glenn gayud maoy mipatay sa iyang amahan.
Matud pa ni Jamiri nga ang maong mga saksi mipahayag nga ilang nakita si Glenn nga migawas gikan sa balay sa biktima pipila ka minutos human sa nabati nilang mga buto-buto sa armas gikan sa maong balay.
Dugang taho nga nakuha ni Jamiri nagkanayon nga dugay na nga tiggamitan og gidiling drugas si Glenn hinungdan nga kanunay kining mag-away ug ang iyang amahan.
Nasayran nga niadtong Martes sa buntag miadto si Glenn sa balay sa iyang amahan nga si Simplicio kay nangayo og kuwarta ug malagmit gibalibaran sa biktima nga misangko sa ilang panaglalis ug gitapos pinaagi sa pagpusil patay sa biktima.
Hinuon dihang nahinabi sa mga tigbalita, ang suspetsado mihimakak kini sa maong pasangil.
Sa pagkakaron natanggong na sa prisohan ang suspetsado samtang gihikay na ang kasong parricide batok niini. (/WC) (BANAT NEWS)