Aksidente usa patay, pari ug sakristan angol

CEBU, Philippines - Patay nang nadangat sa tambalanan ang usa ka kawani sa pabrika og semento human kini mabanggai og sakyanan samtang nagbarog daplin sa highway sa barangay South Poblacion sa siyudad sa Naga kagahapon sa alas 5:40 sa buntag.

Ang biktima mao si Ma. Victoria Saramosina,37, nagpuyo sa maong lugar ug production clerk sa Apo Cement Factory nga nagbase sa maong siyudad. Ang drayber sa Isuzu Elf nga nakadasmag niya nga si Francis Villegas gitanggong na sa kapolisan.

Matud ni PO2 Ken Cabrera, desk officer sa Naga City Police dihang nahinabi sa Banat News nangangkon ang drayber nga dunay kalit milabang nga traysikol maong milihay kini.Apan adto kini napunta sa gibarogan sa biktima ug nadasmagan kini, patay na kini pagdala sa Minglanilla District Hospital.

Sa laing bahin, naangol ang usa ka pari nga si Fr. Willy Genelazo, kura paroko sa Lipata Parish Church ug ang iyang angkas nga sakristan nga si Virgilio Tiguelo, 18. Ang duha mao pay paggawas giikan sa barangay road sa Lower Pakigne diha sa highway sa Minglanilla, napunggit sila sa Mitsubishi Fuso Canter nga gimaneho ni William Singson. Ang duha gihatud sa South General Hospital sa Naga City ug sa paghimo ning balita luwas na sila sa peligro.  (Darrel A. Carumba/EIM) (BANAT NEWS)