Kong. Osmeña gi-Ombudsman ni Rama

CEBU, Philippines - Pormal nang gisang-at ni Mayor Michael Rama kagahapon sa buntag diha sa buhatan sa Ombudsman Visayas ang iyang reklamo batok kang Kongresista Tomas Osmeña kalabot sa duha ka kontrobersyal nga US Dodge cars.

Mitambong una og Santos nga Misa si Rama uban sa iyang gatosan ka mga supporters diha sa Our Lady of the Sacred Heart Capitol Parish sa wala pa sila nagmartsa padulong sa buhatan sa Ombudsman.

Human sa misa nagmartsa ang mga supporters ni Rama nga nagdala og placards ug replica sa maong kontrobersyal nga mga sakyanan padulong sa Ombudsman. Gawas sa kongresista lakip sa gipasakaan niya og reklamo ang igsuon niini nga si Maria Victoria “Minnie” Osmeña, ug ang anak niini nga si Paulo.

Sumala pa ni Rama gidonar sa Bigfoot Entertainment ang maong mga sakyanan ngadto sa kagamhanan sa siyudad sa Sugbo niadtong 2009. Ang maong sakyanan nakapangalan karon nila ni Minnie ug Paulo Osmeña.

Una na nga mipadayag ang kampo sa kongresista nga ang mga sakyanan nga gihimo og police car wala gidayon og donar sa tag-iya sa Bigfoot Entertainment nga si Michael Gleissner sa siyudad human nasayring hapit na mahupas ang termino ni Osmeña niadtong higayona. Usa sa wala gikahimuot ni Rama ang pagpatapot sa maong sakyanan og official seal sa City Hall. Niadtong milabay’ng adlaw’ng Lunes si Osmeña kinsa daan nang nagtuong ireklamo siya tungod sa maong mga sakyanan miingon nga ‘showbiz’ lang ang maong kasikas, apan iyaha kining gihangop aron mahatagan siya og tsansang makaeksplikar sa maong kontrobersiya. (Sanden J. Anadia/EIM) (BANAT NEWS)