Housing project alang sa mga tigbalita

CEBU, Philippines - Ang mga miyembro sa Cebu Federation of Beat Journalist (CFBJ) kinsa wala’y mga kaugalingong pinuy-anan makabaton na unya og mga pinuy-anan matud sa presidente sa CFBJ nga si Elias Baquero.

Kagahapon gipahigayon diha sa Casino Español sa dalan Ranudo, dakbayan sa Sugbo ang general assembly sa CFBJ kini kalambigitan sa pagsaulog sa Press Freedom Week nga gibuksan niadtong Domingo.

Ang CFBJ mao ang kahugpongan sa tanang mga reporters, photographers, cameramen sa nagkadaiyang media outlet sa Sugbo nga gibahin base sa ilang mga beats o nadestinohang lugar o buhatan sa gobiyerno nga ilang koberan.

Ang CFBJ gilangkoban sa PNP-Defense Press Corps (DEPP); Regional Journalist in Cebu (REJOICE); City Hall Association of Reporters in Media (CHARM); Media Alliance for Law, Liberty, Equality and Truth (MALLET); Entertainment Group (e-Group); Media in Cebu South (MICS); ug  Association of Reporters in Mandaue And Lapulapu In Truth and Excellence (ARMALITE).

Gibutyag ni Baquero nga usa sa proyektong gipaninguha sa CFBJ mao ang housing program sa mga miyembro tungod kay kasagaran sa mga sakop sa CFBJ walay mga kaugalingong balay. (Brenda D. Batuto/EIM) (BANAT NEWS)