Ekstorsyonista sa Colon

CEBU, Philippines - Pipila ka mga drayber ang mitiyabaw na tungod sa mga ‘manghingi-ay’ sa kadalanan sa bisan asa nga rota sa dakbayan sa Sugbo apan ang mga awtoridad walay gihimong aksyon matag adlaw batok niining maong mga mangwartahay.

Ang susamang klase sa pagpangolekta og kwarta maisip nga ilegal ug usa ka matang sa pagpangilkil o extortion nga ang biktimahon mao ang mga drayber nga hadlok pasipad-an sa maong mga tawo. Ang Banat Manobela pipila na ka higayon nga nakabantay nga ang mga drayber motunol o moitsa og kwarta sa mga dispatser nga dili moubos sa P5, ug kining mga dispatser nga ekstorsiyonista duna say kaugalingong lugar diha sa dalan nga diin diha ra sila mag-atang.

Tungod sa kahawod niining mga tawhana diha sa kadalanan dili kalikayang magduda ang publiko nga dunay mga awtoridad nga nagkupot kanila, bisan ilegal ang ilang gipanghimo matag adlaw ug sa halos tanang oras, walay gipangdakop kanila. Kung duna man makagawas ra dayon ug balik na usab sa ilang binuhatan.

Base sa pagpaniid nga gihimo sa Banat Manobela, ang mga rotang nagbiyahian og Basak-Colon; Pardo-Colon; Bulacao-Colon nga moagi diha sa dalan Colon maoy sagad nga biktimahon sa maong mga ekstorsiyonista.

Samtang sa amihanang bahin sa siyudad biktima usab ang mga drayber sa rotang Basak-Minglanilla; Punta-Minglanilla; Tabunok-Naga. Diha sa downtown Colon, atubangan sa usa ka gamay nga mall adunay magtapok nga kalalakin-ang itsahan sa ubang drayber og tag 5 pesos kada agi. Matud pa sa atong gikahinabing source dili modawat og ubos sa P5 ang maong grupo.

Gihulagway sila sa mga sources nga ‘dakong grupo’ kay “torno-torno” usab ang mangolekta nga daw nahimo na nila kining regular nga trabaho sa matag adlaw, kining dapita malabay ra og bato gikan sa pundohan sa mga patrolcars sa Cebu City Police Office ug sa City Traffic Office Management (CITOM).

Usa ka 38-anyos nga drayber nga gikahinabi sa Banat Manobela ang mitug-an nga “dakong risgo” sa ilang kinabuhi kun dili sila mohatag og kwarta ngadto sa mga manghingiay kay basin sila pareglahan. Bisan paman gihagoan nila ang maong sensilyo mas gipili nilang motunol og P5 nungka ibaylo ilang kinabuhi tungod kay wala may gihimo ang mga awtoridad sa pagpapahawa sa maong mga ekstorsyonista.

“Delikado man pud gud og dili mi mohatag, moana man na sila nga gahi kaayo nang draybera. Birahan ka ana nila. Pang-amongay lagi na ilaha,” matud pa sa maong drayber nga dunay pamilyang gibuhi pinaagi sa pagpamasahero.

Sa napulo ka tuyok sa usa ka pasaheroan (depende sa rota) sa tibuok adlaw diha sa dalan Colon, P50 ang ilang ‘kalas’ sa mga ekstorsyonista. Kung dunay 100 ka pasaheroan nga motunol og P5 sa usa ka agi, P500 ang makilkil. Unsa nalang kung ang matag usa ka sakyanan makatuyok og tag napulo?

Sumala pa nga bahinbahinon sa grupo ang tibuok adlaw nga kinilkilan ug ang source miingon nga mas dako pa og kita ang maong mga dispatser itandi sa mga drayber sa matag adlaw nga makadala lang og P300 sa matag adlaw. (BANAT NEWS)