CEBU, Philippines - Siyam ka mga empleyado sa Cebu City Hall ang miangkong tiggamitan og ginadiling drugas atol sa supresang drug test sa 36 ka mga empleyado nga nadestino sa Parks and Playgrounds.
Sumala pa sa operations officer sa Office on Substance Abuse Prevention (COSAP) nga si Jun Reyes nga lima niini mga casual ug upat ang job orders.
Hinuon ang 36 ka mga empleyado sa nahisgutang departamento nag-negatibo sa drugtest. Wala na apila sa drug test ang siyam nga una nang miangkong tiggamitan sila og ilegal nga drugas.
Sumala pa ni Reyes nga iduso niya sa buhatan sa mayor ug sa Human Resources Department ang mga pangalan sa siyam ka mga empleyado nga miangkon nga daan nga tiggamitan og ginadiling drugas.
Dugang pa ni Reyes nga kasagaran sa mga empleyado nga mogamit og drugas ang dili ma-renew alang sa casual ug taktakon ang mga job orders.
Kanunay nga gibuhat sa COSAP ang surpresang drug test sa mga kawani sa Cebu City Hall isip mga modelo alang sa kampanya nila batok sa ginadiling drugas.
Nagpadayon usab karon ang programa sa COSAP nga mao ang pagdalit nila og stage drama sa nagkadaiyang barangay kung diin ang tema niini mao ang bati nga butang nga mahatag sa ginadiling drugas. (/EIM) (BANATNEWS)