Minibus midaro sa 4 motor usa patay

CEBU, Philippines - Usa ang patay ug laing pito ang nangaangol apil na ang 9-anyos nga batang lalaki ug 14-anyos nga dalagita human gidaro sa usa ka minibus nga nawad-an og preno ang gisundang upat ka mga motorsiklo diha sa highway sa barangay San Isidro lungsod sa San Fernando niadtong alas 8:00 sa niaging gabii.

Ang namatay pag-abot sa tambalanan mao ang pasahero nga si Jovelyn Nierras, 34, asawa sa nagmaniho sa motorsiklo nga si Richard Nierras, 37, ug nangaangol usab ang ilang 9-anyos nga anak nga si Rich Bon Jovi.

Ang ubang mga naangol mao ang drayber sa Honda Wave nga motorsiklong si Sherwin Amistoso, 23, taga Balud, Dalaguete ug angkas nga si Sarah Mae Martinez nga mabdos; naangol usab ang drayber sa ikatulong motorsiklo nga si Miguel Zapanta, 31, taga Doldol lungsod sa Dumanjug ug ang ikaupat nga motorsiklo kansang drayber naangol usab mao si Nelson Paraiso, 48, taga Wireless sa siyudad sa Mandaue ug angkas nga si Angel Mae Colina, 14.

Samtang ang drayber sa Mark Mini bus nga dunay rota nga siyudad sa Sugbo paingon sa lungsod sa Sibonga giilang si Mario Cahotay, 41, taga siyudad sa Carcar.

Matud ni PO2 Jose Claire Palagtiosa sa San Fernando Police dihang nahinabi sa Banat News miangkon ang drayber sa minibus nga daan na niining namatikdan nga may problema ang brake sa minibus nga iyang gimaneho apan mipadayon gihapon kini sa iyang pagbiyahe.

Atol sa hitabo, gibanabanang 14-metros gikan sa luyo sa unang motorsiklong iyang nadaro nabantayan nga dili na mopaak ang brake maong naharos gyud niini ang maong mga motor. Samtang ang minibus drayber natanggong karun sa karsel human gihikay ang kasong ipasaka batuk niya. (/EIM) (BANATNEWS)