CEBU, Philippines - Gipusil patay sa kriminal nga wala hiilhi ang usa ka drayber sa traysikol samtang nagsayaw kini sulod sa diskohan uban sa iyang hinigugma atol sa kasaulogan sa pista sa barangay Consolacion sa lungsod sa Dalaguete niadtong Domingo sa kaadlawon.
Ang biktima mao si Bernabe Debuayan, 25, ulitawo, nga nagpuyo sa Sitio Pooc, barangay Balud, lungsod sa Dalaguete ug usa ka drayber sa traysikol .
Si SPO1 Veronico Centino, Desk Officer sa Dalaguete Police Station mibutyag sa Banat News nga samtang nagpunay og sayaw ang biktima uban sa iyang hinigugma gipanid-an lang diay kini sa kriminal.
Dihang mihunong makadiyot og sayaw ang biktima, gipusil dayon ang ulo niini ug dihang natumba sa yuta, misirit usab dayon ang kriminal ug mipalayo sa maong lugar.
Ang biktima gisuwayan og hatud ngadto sa Cardinal Rosales Hospital diin kini ideklarar nga dead on arrival.
Matud pa ni SPO1 Centino nga ang biktima maoy bugtong saksi sa kasong murder nga nahitabo sa maong lugar tulo ka tuig na ang milabay ug mao kini ang anggulo nga gisubay sa kapolisan karon, samtang padayon pa nilang gipangita karon ang kriminal. (/WC) (BANATNEWS)