Programa sa pagdaginot sa kuryente gilusad

CEBU, Philippines - Tulo ka ahensya sa kagamhanan kauban sa ahensyang internasyonal   nagtambayayong sa paglusad og programa nga nagtinguha nga makadaginot ang kagamhanan og konsumo sa kuryente nga 2 milyones kilowatt hour napulo ka tuig gikan karon. Kini mao ang   Department of Energy (DOE), Department of Science and Technology (DOST), ug Department of Trade and Industry (DTI)   inabagan sa United Nations for Industrial Development Organization (UNIDO) mo-implementar sa proyektong gitawag nga Energy Management Systems Standards and Sytems Optimization of the Philippine Industrial Energy Project (EnMS)

Kining maong sistema sagupon sa nasud aron tudloan ang matag industriya sa pagsagop og mga panukdanan sa pagdaginot sa konsumo sa ilang kuryente.

Sumala pa ni DOE Regional Director Antonio Labios,   (DOST) 7 nga buot nilang sagupon sa nagkadaiyang industriya sa nasud ug bisan sa matag panimalay ang tukmang pagdaginot sa kuryente aron nga dili usab kini mabuktot sa pagpas-an sa dagkong bayranan sa sugang dagitabnon.

Matud pa ni Labios   nga pipila sa paagi sa pagdaginot sa konsumo sa kuryente mao ang paghimo og architectural design sa edipisyo o balay nga puno sa kahayag ang sulod   nga dili na kinahanglang gamitan og suga    maadlaw.

Gawas niini angay usab nga diskobrehon ang desinyo sa edipisyo o balay nga may tukmang bentilasyon o kalusot-lusotan sa hangin aron nga bugnaw ang sulod niini nga di na kinahanglang gamitan pa og air-conditioning unit.

Tungod niini ipahigayon ang mga seminar sa tanang mga enhinyero aron    ilang tun-an ang mga bag-ong teknolohiya ug desinyo sa mga building ug mga pinuy-anan nga di kaayo magsalig sa kuryente.

Kini sa tinguha nga makab-ot ang gitinguhang pagdaginot sa konsumo o 2 milyones ka kilowatt hour   10 ka tuig gikan karon.

Kining maong proyekto nagsugod niadtong Disyembre sa miaging tuig ug daghan na ang mga kompaniya   nga nagpakita og kasibot nga mosalmot sa maong programa ilabi na kadtong ana sa sector sa patigayon. (BANAT NEWS)