Bureau of Immigration molusad og service day

CEBU, Philippines - Ang Bureau of Immigration molusad sa ilang bag-ong programa nga “Immigration Service Day” sa sunod semana.

Sa Memorandum Order (MO) No. RADJR-2012-024 ni BI Commissioner David Jr. nagkanayon kini nga ang maong programa gipatuman aron ang mga BI sub-port nga opisina mopalapad sa ilang serbisyo ngadto sa tanang mga hingtungdan kausa matag semana mga lugar nga giila sa ahensiya.

Ang maong mga serbisyo ilang iatol sa mga dakong kalihokan sa barangay sama sa kulturanhong kalihokan, mga piyesta, founding anniversary sa lalawigan ug kalungsoran diin ang BI adunay sub-port.

Pinaagi sa usa ka memorandum order, si BI-Cebu Alien Control Officer (ACO) Casimero Madarang III nagkanayon nga ang Immigration Service Day ipahigayon sa sunod semana dinhi sa Sugbo apan nangita pa sila og lugar kung asang dapita nila kini ipahigayon.

Matud ni Madarang nga nakig-alayon pa sila sa local nga kagamhanan aron motudlo og lugar kanila diin angay nila ipahigayon ang ilang programa.

Base sa MO nga ang mga hingtungdan nga ACO kinahanglang mogama og mga representasyon uban sa lokal nga kagamhanan sa probinsiya, siyudad ug kalungsoran sa lugar nga ilang mapili.

Kini aron pagsuta kung wala bay mga balayranan ang gamitong lugar, haom ug hamugaway ba kini,   duna bay mga furniture, fixture ug ekipo, ug duol ba kini sa provincial capitol, city hall o municipal hall nga maoy mahimong Immigration Service Desk.

Ang hingtungdang ACO kinahanglang mopili kun unsang adlawa sa semana mopahigayon og service day sa ilang mga lugar nga dili makaapekto sa operasyon sa sub-port office.

Ang ACO gimanduan usab nga motunol og weekly report ngadto sa commissioner sa tanang immigration services sa tanang serbisyo nga ilang gipahigayon sa ilang mga lugar. (BANAT NEWS)