Team Rama di manaod og streamer

CEBU, Philippines - Gipasalig ni Mayor Michael Rama nga ang Team Rama dili mamitay ug dili mopapilit og mga campaign streamer lahi sa gihimo sa kaatbang nila nga Bando Osmeña Pundok Kauswagan (BOPK).

Kini bisan managsama ang gibuhat sa Team Rama ug BOPK nga nagpahigayon og mga pulong-pulong sa kabarangayan ning dakbayan.

Sumala pa ni Rama nga ipakita niya sa katawhan nga sinsero siya sa iyang kampanya sa paghinlo ning siyudad gikan sa mga campaign material nga ipamitay ug ipapilit sa mga pader, poste sa kuryente, mga bungbong sa edipisyo ug bisan asang dapita ning siyudad.

Gumikan niini nagpadayon na karon ang tinangtangay ug linaksiay sa mga streamer nga mugna sa mga politiko kinsa nagtinguha danihon ang katawhan aron mobotar kanila sa umaabot nga eleksyon.

Ang maong gimbuhaton gipangunahan   sa chief of staff ni Rama nga si Philip Zafra kinsa maoy gitahasan sa pagpanangtang sa mga propaganda material sama sa Type O streamer nga maoy simbolo sa pangulo sa BOPK nga si Kongresista Tomas Osmeña.

Gipadayag ni Zafra nga tataw kaayo nga nag-abusar ang mga tawo nga maoy nagpaluyo sa maong mga streamer busa may miawhag kanila nga padauban ang maong mga streamer.

Matud pa ni Zafra nga wala siya’y pilion ug bisan unsa nga streamer langkaton gayud nila gikan sa nahimutangan niin.

Apan gihangyo ni Zafra ang mga tag-iya   sa maong mga streamer nga angay unta silang morespeto sa mayor kay may gahum ang pagpatuman sa balaod. Ang kagahi ra ba sa utok sa mga tag-iya sa maong streamer magbunga og kakuyaw sa umaabot nga eleksyon tungod kay masawayan sila    sa katawhan nga mosangpot na hinuon nga dili na sila botaran. Matud pa ni Zafra nga maayo baya ang tinguha sa mayor tungod kay alang man kini   sa kaayohan sa siyudad ug sa katawhan.

Ang pagpanglangkat sa mga streamer sa kadalanan sa siyudad   kabahin usab sa “Beautification Project” sa dakbayan, matud pa ni Zafra.

Amenado si Zafra nga dili dayon maka-monitor ang iyang mga tawo sa mga tawo nga manaod og streamer ug posible nga sa oras sa kaadlawon kini nila ipamutang. Nasayran nga dili sila kalangkat og streamer nga gipahimutang sa mga pribadong establisamento.

Langkaton lang nila kadtong gipamutang sa mga poste ug uban pa nga pampublikong mga lugar.

Hinuon ang mga tawo nga nasayud na  sa gibuhat   sa mga abusadong politiko nga dili kaantigo morespeto og balaod ug sa mayor nga nagpatuman niini, mga botante nay mohukom kanila sa umaabot mga piniliay, matud pa ni Zafra. (/WC)  (BANAT NEWS)