Kagawasan sa media mahinungdanon-Fr.Diola

CEBU, Philippines - Pormal nang gibuksan kagahapon sa buntag ang pagsaulog sa Press Freedom Week diin ang mga sakop sa media pinaagi sa usa ka parada gikan sa Cebu Business Park paingon ngadto sa SM City Mall. Sa Santos nga Misa nga gisaulog ni Padre Carmelo Diola siya mipasabot sa kamahinungdanon sa kagawasan sa prensa aron mapaabot ang hustong impormasyon ngadto sa katawhan.

Si Diola sa iyang homiliya mipaambit nga kapin sa pito ka tuig pa ang milabay gikan gideklarar sa diktador nga kanhi presidente Ferdinand Marcos ang Martial Law niadtong Septiyembre 21, 1972 una pa siya masayod sa tinud-anay nga kahimtang sa Pilipinas.

Miangkon siyang sulod sa panahon sa iyang kabatan-on kaniadto idolo niya si Marcos gumikan kay walay negatibong balita nga iyang nadunggan ug ang tanang mga media outlets parehas ra og balita.

Apan nahigmata siya dihang miadto siya sa Amerika aron tiwason ang iyang pagtuon ug didto gikan sa nagkadaiyang media outfits nga dili sa Pilipinas, iyang nakita ug nasabtan ang pait nga kahimtang sa nasud. Matud pa niya nga wala siya magdahom nga ang giidolo niyang si Marcos dili diay maayong pangulo.

Sumala pang Diola nga mahinungdanong dunay kagawasan ang media sa pagpadayag tungod kay pinaagi niini mapaabot ngadto sa katawhan ang mga impormasyong katungod nilang masayran.

“I was blind that I was not free but I did not know it,” ni Padre Diola pa. Gihagit usab ni Diola ang mga tigbalita nga batasanon gyud ang pagpangutana ngadto sa tinubdan sa ilang balita tungod kay nag-agad sa ilang mga pangutana ang ilang panginabuhi isip tigbalita. “Ask question your livelihood depends on that,” ni Diola pa, nga bisan wala moklaro sa iyang gipasabot, kini nasabtan sa kamahinungdanon sa hiyas sa usa ka tigbalita nga mangutana gyud ug dili magpaabot lang kung unsay ihungit kanila sa tinubdan sa balita.

Lakip sa hagit ni Diola sa media mao ang pagpabiling mapahiubsanon sa tanang higayon samtang naghimo sa ilang trabaho. Human sa Santos nga Misa gisunod dayon ang kalihukan sa programa nga gilangkuban sa raffle ug dance contest ug ang paglingaw sa GMA talent nga si Chris Lawrence. (BANAT NEWS)