Gipasuwawan sa suga dayon gitagod og tigbas

CEBU, Philippines - Talandugon ang kahimtang sa usa ka babaye human kini gitigbas sa usa usab ka babaye pasado alas-3 sa kaadlawon kagahapon diha sa dalan Legaspi barangay Sto. Niño dakbayan sa Sugbo.

Ang biktima nailhan nga si Cecile Epiz, 34, molupyo sa dalan Cabantan sa barangay Mabolo samtang ang mamumuno gihulagway lang nga usa ka wa mailhing babaye.

Sa pasiunang imbestigasyon sa kapolisan nasayran nga ang biktima diha sa maong lugar nagbarog-barog dihang kalit nga adunay usa ka sakyanang kalit nga mipasiga og headlights sa iyaha.

Tungod sa kasulaw sa suga wala siya makabantay sa babayeng miduol kaniya nga kalit lang mitigbastigbas sa iyang kalawasan hinungdan sa iyang pagkahagba sa dalan.

Human sa maong insidente daling miikyas ang wala mailhing babaye samtang ang biktima daling gidala sa mga kaubanan sa Cebu City Medical Center.

Ang kapolisan nagsubay pa karun kun unsa ang motibo sa pagpanigbas ug kun si kinsa ang maong babaye. (/EIM) (BANATNEWS)