2 nadakpang nangawat sa kabli sa Globe

CEBU, Philippines - Apektado ang komunikasyon sa Globe Telecom sa lungsod sa Balamban human kawata ang ilang cable wire nga gibana banang mokantidad og dul-an sa P100 mil apan nadakpan hinuon ang duha ka suspek diin usa niini menor de edad didto sa taytayan sa barangay Buanoy, lungsod sa Balamban niadtong Biyernes sa ala 1:45 sa kaadlawon.

 Ang nabiktima sa maong kawat mao ang Globe Telecom nga gi-representahan ni Julito Tasan, hingkod nga maoy pangulo sa Bantay Cable Task Force Cooperative nga nag-abang sa   usa ka apartment sa barangay Abucayan, Balamban.

Samtang ang mga nadakpan mao sila si Jesus Juarez alyas Susi, hingkod ,nga taga Media Onse, dakbayan sa Toledo ug ang kauban niini nga usa   ka 16 anyos nga bayong-bayong nga taga dakbayan sa Toledo.

Ang ilang nakuha nga copper wire gibana- banang mokantidad og P89,524 mil nga gihulagway ni Tasan nga naka-apektar sa komunikasiyon sa Globe sa maong lungsod.

Si PO2 Godofredo Dumdum sa Balamban Police Station mibutyag sa Banat News nga sa wala pa ang maong pangawat ang duha ka suspek nakit-an ni Jaime Calvo, tanod nga nag -roving nga nagbitbit og sako nga adunay sulod nga gabas sa puthaw.

Paglabay sa pipila ka oras ilang nasakpan sa akto ang duha ka suspek nga nanghipos na sa ilang mga pinutol nga copper wire dapit sa taytayan sa maong lugar hinungdan nga ila dayon kining gisukit-sukit ug dihang nasuta nga nangawat kini sa mga cable gidakop ug gidala sa buhatan sa kapulisan ug nakuha sa ilang mga kamot   ang daghang cable nga pinutol.

Gibalhug na karon sa karsel ang duha ka suspek samtang gihikay ang tukmang sumbong nga ipasaka batok kanila apan gitakdang i-turn over kini ngadto sa DSWD ang menor de edad.(/WC) (BANATNEWS)