Tulisan patay, lider ug 5 ka sakop nadakpan

Iloilo City— Patay ang usa ka gidudahang tulisan ug nadakpan ang unom ka mga kauban niini lakip ang gitumbok nga lider human giingong nanulis sa usa ka cooking oil depot sa Brgy. Jibao-an, Pavia, Iloilo. Walay swerteng napusilan sa mirespondeng mga sakop sa Iloilo Provincial Public Safety Company (IPPSC) si Sonny Boy Daung, residente sa Dingle, Iloilo, human gikatahong misuway og labay og granada ngadto sa mga polis.

Si Senior Inspector Charlie Sustento, ang hepe sa IPPSC 1st Maneuver Platoon miingon nga wala silay laing nahimo kondili ang pagpusil kang Daung tungod kay giibot na niini ang pin sa maong granada, apan swerteng wala mabuhii sa suspek ang safety lever maong wala kini moulbo.

Ang mga nadakpan mao sila si Raymund Emy, 37, usa ka hepe sa mga tanod sa Brgy. Agcuyawan Pulo, Barotac Nuevo, Iloilo; Elmer Lecoan Velasco, 39; Joebert Gumban, 34; Raymund Ngirngir, 53; Edwin Anorico, 37; ug Joemarie Gine Parcon, 34.

Sumala pa nga si Gumban maoy lider sa maong grupo samtang si Ngirngir gikatahong maoy drayber sa ilang gisakyang Clint Taxi, nga usa sa mga getaway vehicle sa grupo.

Sa wala pa kini mahitabo, ang pito uban sa mga kaubanan nilang nakaeskapo mitulis sa King’s Oil. Giingong nagpakaaron-ingnong mga wholesale buyers og mantika ang grupo. Gigapos ang gwardiya ug gisakiyo ang P200,000.

Pakyas sila pag-abli sa cash vault kay may time delay lock systems kini ug pagkahuman daling nanakay sa ilang upat ka motorsiklo ug usa ka taksi ug nangikyas. Apan usa ka kilometro gikan sa maong pabrika naapsan sa mga mirespondeng mga polis samtang padulong na untang mosulod sa Savannah Subdivision, apan tungod sa nag-backing nga trak natanggong sila sa dalan.

Tungod niini gikatahong gikuha ni Daung ang granada apan nakaplastada na ang mga polis. Human mahagab si Daung miisa na lang sa ilang mga kamot ang mga kaubanan niini.

Nakuha gikan kanila ang duha ka .38 revolvers, usa ka caliber .9mm pistol, usa ka hand grenade, napulo ka 10 mobile phones, handheld radio, nagkadaiyang identification cards, ug cash nga P24,400 sa sulod sa duha ka bag.Nagtuo ang kapolisan nga ang duha ka tulisang nakaeskapo maoy nagdala sa ubang kwarta. (/EIM) (BANATNEWS)