2 ka SWAT imbestigahon sa RIAS-7

CEBU, Philippines - Ang Regional Internal Affairs Service (RIAS-7) gimandoan sa Camp Crame nga mohimo og ‘moto propio’ nga imbestigasyon kalabot sa nahitabong pagpangulata sa duha ka sakop sa Special Weapons and Tactics Unit ngadto sa Papua New Guinea nga tinun-an.

Si RIAS-7 deputy chief Bihay mibutyag nga mihimo sila karun og moto propio nga imbestigasyon diin bisan pa man og wala ang presensya sa biktimang si Benidict Penini ila gihapong ipadayon ang maong imbestigasyon.

Matud pa ni Bihay nga ang ilang parallel investigation basehan aron pagtandi sa ilang mga tagsa-tagsa ka imbestigasyon nga gihimo usab sa ubang police units kabahin sa maong insidente.

Si Penini girespondehan sa mga polis lakip na sila si PO1 James Philip Tanza ug PO2 Bradford Lavandero tungod sa giingong pagmaoy sa maong langyaw ug nanghapak og bato sa nawong sa usa ka drayber sa taksi nga si Giovanni Catib.

Gani, gitug-an ni Bihay nga anaa pa sila sa proseso nga ilang gipangkuha ang mga affidavit sa mga nakasaksi niadtong higayona nga girespondehan sa mga sakop sa SWAT ang maong langyaw nga nagmaoy sa barangay Banilad.

Kahinumduman nga niadtong Miyerkules sa kaadlawon milarga balik sa ilang nasud si Penini kini aron usab mo-relax ug sabotan sa iyang pamilya kun unsa may angayang pagabuhaton.

Samtang ang buhatan sa Cebu City Police Office pinaagi sa ilang director nga si Sr. Supt. Melvin Buenafe mipadayag usab nga andam silang makig-areglo kun ugaling makig-areglo usab ang kampo sa maong langyaw.

Ang kampo ni Penini wala moluwat og affidavit ngadto sa buhatan sa Commission on Human Rights ug wala pa usab kini mopasaka og kaso batok sa duha ka polis.

 (BANAT NEWS)