CEBU, Philippines - Duha sa lima ka mga suspetsadong kawatan nga ang modus operandi “Salisi” o lipatlipat ang nadakpan sa barangay Poblacion sa lungsod sa Asturias niadtong Miyerkules sa alas 4:17 sa hapon samtang gipangita pa ang ang tulo ka kauban niini.
Ang nangadakpan mao sila si Beatriz Padigos, 66, taga barangay Bato siyudad sa Toledo ug usa ka Junrey David, taga Candulawan siyudad sa Talisay kinsa giingong nangawat sa tindahan sa negosyante og bugas nga si Loreta Espana, 49.
Padayon pang giila sa kapolisan ang tulo nga giingong maoy nakabitbit sa kwartang ilang nasakiyo sanglit nagmagahi ang duha sa pagtug-an sa ilang mga pangalan.
Matud ni PO2 Cesar Climaco sa Asturias Police Station nga nahinabi sa Banat News nanulod ang upat ka suspek apil na ang duha ka nangadakpan ug nagdungan og pangutana sa mga presyo sa mga baligya.
Ang helper nga nag-inusara lang naglibog hinungdan nga mitabang si Espana sa pag-atiman sa mga suspek apan dihadiha usa sa mga suspek ang miadto sa lamesa ni Espana ug gikuha ang bag niining may halin nga 5 mil pesos.
Giingong gipasapasa sa mga suspek ang bag hangtud nga silang tanan nanggawas apan nakamatikod si Espana ug daling migawas ug nangayo’g tabang sa mga tawo hinungdan gibiyaan sa tulo luwan sa usa ka awto ang duha ka kauban nga maoy nadakpan. Ang awto usa ka sedan nga kolor puti ug may plakang “501” ang numero. (/EIM) (BANATNEWS)