Armas sa sikyu gikawat sa mga bata

CEBU, Philippines - Armas sa security guard sa usa ka laboratoryo sa barangay Bulacao dakbayan sa Talisay gikawatan sa iyang service firearm sa tulo ka mga bata niadtong Miyerkules sa gabii.

Swerteng nabalik ang armas nga giisyu kang Ponciano Desoacido Nemes, 29, taga barangay Lamak, lungsod sa Dumanjug human sa gihimong followup sa kapolisan sa Talisay pinangulohan ni SPO4 Daniel Tarucan.

Ang 9 millimeter pistol nga dunay serial #9800332 nga giisyu sa Pyramid Security Agency diin masakop si Nemes nabawi sa kapolisan gikan sa upat ka batang nag-edad og 10-anyos, 14 ug duha ka 13-anyos.

Duha sa mga suspetsado taga sitio Mananga II, barangay Tabunok dakbayan sa Talisay ug ang laing duha taga barangay Bulacao, Pardo ug Barangay Inayawan, dakbayan sa Sugbo.

Sa imbestigasyon sa kapolisan   si Nemes giingong mitubag sa sugo sa lawas ug gibilin ang armas sulod sa kahon sa lamesa sa security booth apan sa iyang pagbalik nawagtang na ang nahisgutang armas.

Si Nemes mibutyag sa mga polis nga nakabantay siya nga dunay upat ka mga bata duol sa iyang nahimutangan hinungdan nga gisubay kini sa mga polis hangtud nga sila natultolan.

Ang upat ka mga menor gidala sa mga polis ug gitugyan ngadto sa City Social Welfare samtang gipaabot nga mag-atubang og kasong administratiba ang maong gwardiya. (/EIM) (BANATNEWS)