Dul-an P.5M alahas gikawat

CEBU, Philippines - Mokabat ngadto sa dul-an sa tunga ka milyon ka pesos nga mga alahas ang nasakiyo sa mga gidudahang akyat-bahay nga misulod sa balay sa usa ka Overseas Filipino Worker (OFW) nga nagpuyo sa barangay Basak sa dakbayan sa Mandaue niadtong Lunes sa gabii.

Ang mga biktima nailhan nga sila si Clif Taneo, 39, OFW, ug silingang si Herasalia Malesido,60, taga barangay Sambag sa dakbayan sa Sugbo.

Sumala pa ni SPO4 Edgardo Pasaylo nga si Taneo lumargahay na og balik ngadto sa nasud sa Canada diin siya magtrabaho karong umaabot nga Septiyembre 22.

Matud pa ni Pasaylo nga kauban ni Taneo sa trabaho didto sa Canada ang anak ni Malesido nga maoy tag-iya sa mga alahas nga giapil og sakiyo sa mga kawatan uban sa iyang mga alahas. Nasayran matud pa nga gilukat ni Malesido ang mga alahas nga giprenda sa iyang anak ug gihatod sa panimay ni Taneo kinsa lumargahay na sa sunod semana aron ihatag ngadto sa iyang anak nga kauban ni Taneo sa trabaho didto sa Canada.

Apan sa dihang nanglakaw si Taneo ug ang iyang pamilya niadtong Lunes sa gabii nakugang na lang sila pag-uli nga naabli na ang sliding window sa lawak sa magtiayon ug nasuta nga kini giguba.

Sa ilang pagsusi wala na diha ang maong mga alahas nga tulo ka kwintas, bracelets ug pito ka singsing nga gipanag-iya sa anak ni Malesido nga nagkantidad tanan og P203,000 samtang nawagtang usab ang usa ka bracelet ug usa ka kwintas ni Taneo nga nagkantidad usab tanan og P200,000. Ang mga biktima igo na lang misumbong sa kapolisan bahin sa nahitabo. (/EIM) (BANATNEWS)