Gwen di na mag-senador

CEBU, Philippines - Sibaw kaayo ang mga hungihong nga dili na modayun si Gobernador Gwendolyn Garcia sa iyang tinguha pagpapili sa pagka-senador sa sunod tuig nga eleksiyon.

Kay giingong modagan kini sa pagka-kongresista sa ikatulong distrito sa lalawigan nga mabakante ni Kong. Pablo John Garcia kinsa maoy modagan sa pagka-gobernador ubos sa One Cebu Party.

Apan ang kampo sa United Nationalist Alliance diin nasakop si Garcia wala makadawat sa maong taho sumala pa ni Erwin Maceda, ang political officer ni Bise Presidente Jejomar Binay kinsa maoy pangulo sa grupo. Si Garcia didto sa Manila sukad niadtong Martes dihang mikatap ang maong balita bahin sa maong isyu.

Wala usab mokompirmar niini si Kong. Pablo John  apan iyang gibutyag nga daghang mayor sa Sugbo ug mga lider sa One Cebu Party ang nagtinguhang mohangyo sa gobernador nga dili lang una kini palansaron sa pagka-senador. Kini giangkon ni Dalaguete Mayor Ronald Allan Cesante kinsa miingon nga silang mga mayor mohangyo sa gobernador nga magpabilin lang una kini sa Sugbo ug malagmit maoy hinungdan nga nakahukom kini nga magkongresista na lang sa ika-tulong distrito. Matud pa ni Cesante nga lakip nilang hangyoon mao ang Partido Demokratiko Pilipino-Lakas ng Bayan (PDP-Laban) ug si Binay nga dinhi lang una si Garcia sa Sugbo. Dugang pa ni Cesante nga dili na mahimong magbise-gobernador si Garcia sanglit gipili na sa partido si kanhi bise mayor Ramon “Boboy” Durano IV isip kapares ni Pablo John.  (BANAT NEWS)