Staff ni Basillote namusil og tanod?

CEBU, Philippines - Namiligro nga mataktak sa trabaho ang usa ka kawani sa ex-officio member sa konseho sa dakbayan sa Talisay kun mamatud-an kining namusil sa usa ka tanod ug sa kauban niini didto sa barangay Pooc, sa maong dakbayan sa miaging Martes sa buntag.

Ang suspetsado mao si Emiliano Silva, Jr. 44, taga Pooc ug kawani ni Talisay ABC president Charles Basillote.

Samtang ang giingong gipamusil sa suspetsado mao sila si Anastacion Solis, 44, tanod sa barangay Pooc, ug James Mapili, 60, organizer sa maong barangay.

Sa imbestigasyon nila ni SPO1 Edgar Causon ug Benjamin Sebellita sa Talisay City Police Office nasuta nga si Solis ug Mapili nagsakay og motorsiklo paingon unta ngadto sa Villa Solana Village aron magkuha og tseke alang sa barangay.

Apan dihang duol na sila sa eskina gikan sa ilang barangay kalit lang kunong mitungha si Silva nga giingong nagbitbit og shotgun.

Unya giingong gition dayon ni Silva ang sumbohan sa iyang shotgun ngadto kang Solis ug Mapili.

Si Solis usab nga nakasabot nga patyon sila, abtik nga mitukmod kang Mapili ug nagdungan sila og hapa sa yuta busa wala sila maigo sa bala sa shotgun ni Silva.

Apan si Solis nga nagtangkil usab og paltik nga revolver sa maong higayon mibawos pagpusil kang Silva apan wala kini makabuto kay natangtang ang tambor dimalasa, busa mikabad og dagan si Silva ug gipanimon ang iyang shotgun.

Si Kapitan Doroteo Emit sa Pooc mibutyag sa Banat News nga iyang imbestigahon si Solis bahin sa maong insidente.

Samtang si Basillote mibahad usab nga imbistigahon usab niya si Silva ug kun mamatud-an niya kining sad-an dili siya magpanuko sa pagtaktak niini sa trabaho. (BANAT NEWS)