CEBU, Philippines - Ang Loan Condonation Program (LCP) sa Social Security System (SSS) alang lamang kini sa penalty o tubo sa tubo ug walay labot ang principal o kantidad nga giutang ug ang interes o tubo niini.
Mao kini ang giluwatang pamahayag ni Mario Corro, hepe sa SSS sa Sugbo atol sa senemanang Association of Government Information Officers (AGIO) 7 Forum nga gipalanog sa DYMR Radyo ng Bayan Cebu kagahapon sa buntag. Matud pa ni Corro nga ang LCP sa SSS kutob lamang sa Septembre 30 ning tuiga.
Gipasabot ni Corro nga kun ang membro sa SSS mobayad sa principal uban sa interes o tubo niini, ning higayona nga wala pa mabahas ang LCP, dili na siya pabayron sa penalty o tubo sa tubo sa iyang utang.
Apan kun ang nangutang gustong modata-data sa iyang utang, pabayran kaniya ang 80 porsento sa maong penalty dugang sa principal ug sa interes niini.
Midugang si Corro nga ang SSS mohatag og usa hangtud sa tulo ka tuig nga higayon sa pagdata-data sa maong utang ubos sa LCP.
Sumala pa ni Corro nga ang SSS mohatag lamang sa hingpit nga amnestiya sa utang sa membro niini kun kini mainutil sa hingpit ug mamatay. - /WC (BANAT NEWS)