Polis kinahanglang taas og pailob-Buenafe

CEBU, Philippines - Giawhag sa hepe sa kapolisan sa syudad sa Sugbo Sr. Supt. Melvin Buenafe ang publiko nga dili dayon motuo kung unsay ilang nakita sa video footage bahin sa insidente nga nagpakitang gidagmalan sa mga polis ang usa ka nagmaoy nga Papua New Guinean sa barangay Banilad niadtong Domingo.

Apan kini miangkon gikinahangan unta gyud nga mas gipatas-an pa sa duha ka sakop sa Special Weapons and Tactics (SWAT) ang pagpailob ngadto sa langyaw’ng si Benedict Pinini, 29.

Si Pinini gireklamo sa usa ka drayber sa taksi nga mibukbok kaniya og bato sa nawong. Si Pinini nga giingong anak sa usa ka opisyal sa ilang nasud giingong pwerteng huboga ug wala mopatuo sa mga polis.

Tungod sa pagmagahi ni Penini gigamitan siya nila ni PO2 James Philip Tanza ug PO2 Bradford Lavandero og pwersa, apan nakuhaan kini og video footage ug silang duha na hinuon karoy gireklamo.

Nagpaabot pa si Buenafe sa imbestigasyon sa maong insidente. Sa pagkakaron ang duha ka polis gitangtang una gikan sa SWAT.

Si Buenafe mipasidaan sa mga sakop nga kinahanglang responsable sila sa ilang mga gipangbuhat ug kinahanglang magbaton gyud og taas nga pasensya sa pagtuman sa ilang trabaho.

Tambag ni Buenafe sa mga sakop nga isipon kining leksyon tungod kay bisan magkinaunsa moresponde gyud ang polis.

Sa laing bahin, ang Department of Tourism (DOT)-7 mibutyag nga dili sila manginlabot sa maong insidente tungod kay ‘purely police matter’ ra kini.

Gikatahong dunay mga kaubang tinun-an si Penini dinhi sa Sugbo nagtungha apan tungod sa nahitabo sa anak sa usa sa ilang mga opisyal gimando silang papaulion sa ilang nasud.

Dunay kabalaka karon nga posibleng maapektahan ang tinguha sa gobiyernong makadani og turista gikan sa maong nasud, giingong dunay liboang mga Filipino nga atoa magtrabaho sa maong nasud nga gikabalak-ang panimaslan usab tungod sa maong insidente. - /EIM (BANAT NEWS)