Dean nanghikap

CEBU, Philippines - Usa ka dean sa usa ka departamento sa pangpublikong unibersidad sa dakbayan sa Sugbo ang gireklamong mimolestiya sa usa ka 16-anyos nga estudyante niini nga iyang gipugos pagpakuyog sa usa ka motel diha sa North Reclamation Area sa dakbayan sa Mandaue.

Ang maong dean nga 49-anyos nga minyo gipasakaan og kasong Acts of Lasciviousness sa usa ka 16-anyos nga estudyante og mechanical engineering sa maong tunghaan.

Matud pa ni SPO2 Rowena Peñaflor ang Women’s Desk sa Subangdaku Police Station ang nahisgutang kaso napasaka niadtong adlaw’ng Lunes apan matud pa sa biktima, nahitabo ang insidente niadto pang Septiyembre 4.

Ang Banat News wala mohingalan sa maong suspek gumikan kay wala pa kini makakuha sa kopya sa complaint gikan sa Mandaue City Prosecutor’s Office.

Apan base sa pamahayag sa imbestigador niadtong Septiyembre 4 sa buntag padung sa North Bus Terminal aron mosakay og jeepney padulong sa tunghaan ang biktima.

Apan nakit-an niya ang suspetsado sa maong terminal luwan sa sakyanan niini ug mikamay kaniya, giingong nagduhaduha siya pagduol tungod sa kaikog mibalibad siya apan giingong gipugos siyang pasakyon niini tungod kay padulong man usab kini sa maong tunghaan.

“Padulong man kaha ka sa eskwelahan sakay na lang kay magkuyog ta,” maoy pulong nga gisulti sa suspek ngadto sa biktima sumala pa sa imbestigasyon.

Apan dako ang katingala sa biktima kay imbes mopadulong sila sa eskwelahan didto naman hinuon sila misulod sa usa ka motel sa North Reclamation Area.

Sa kahadlok sa biktima wala kini manaog ug ang dean maoy nakig-estorya sa roomboy sa maong motel.

Human niini giingong gipugos ug maisugon ang suspek nga mipasaka sa biktima sa lawak ug pag-abot sa sulod gikatahong gimolestiya siya sa suspek bisan sa iyang paghilak.

Tungod sa pagpunay og hilak sa biktima daw nawad-an og gana ang suspek ug gihagad na lang kini nga mangadto sa usa ka mall dili layo sa maong motel ug didto kini gibilin.

Ang biktima milahos og adto sa tunghaan ug giingong nagkita pa ang duha. Apan pagkaugma misumbong ang maong tinun-an ngadto sa kadagkoan sa unibersidad nga daling mihimo og imbestigasyon sa reklamo.

Human niadto gikatahong wala na mosulod pa sa trabaho ang maong dean.

Matud pa ni Gerry Letrondo, ang chairman sa Committee on Decorum and Investigation (CODI) sa maong tunghaan nga mi-resign na ang maong dean niadtong adlaw’ng Lunes. - /EIM (BANAT NEWS)