Truck ban nakalangay

 CEBU, Philippines - Gitinguha sa pipila ka mga drayber sa delivery truck sa amihanang bahin sa lalawigan sa Sugbo nga kahatagan sila og special permit alang sa pagpadayon sa ilang pagbiyahe bisan sa mga oras sa truck ban sa mga dalan sa Liloan, Consolacion ug dakbayan sa Mandaue.

Si Carlo Parame, 43 anyos, delivery truck drayber nga taga lungsod sa Medellin miangkon nga langan kaayo alang kanilang mobiyahe paingon sa amihanang kalungsoran. Dugang pa niya nga naglakip sa gikarga sa delivery truck nga iyang gimaneho mao ang bugas, mga lamas ug mga linata nga sardinas nga gikumpra gikan sa dakbayan ug ilang dad-on sa tindahan sa ilang agalon sa  amihanang kalungsoran.

Matud pa niya nga kanunay silang alkanse sa ilang pagbiyahe kay alas- 8 sa buntag hangtod sa alas-5 ang ilang trabaho apan lapas na niini ang oras sa ilang trabaho kay malangan man sa truck ban sa ilang paglabay sa dakbayan sa Mandaue, Consolacion ug Liloan.

Ang truck ban magsugod sa alas-6 sa buntag hangtod sa alas-8 sa buntag ug alas-5 sa hapon hangtod usab sa alas-7 sa gabii tungod kay sa maong mga oras ang peak hours tungod kay tingpamauli sa mga trabahante ug mga eskuylahan.

Si Edwin  Ermac nga maoy pangulo sa Traffic Enforcement Agency of  Mandaue (TEAM) nagkanayon nga base sa 60 ka adlaw nilang  pagtuon sa truck ban dako gyud kini og natabang pagmenus sa kahuot sa kadalanan. Tinguha karon niya nga ang konseho sa dakbayan hingpit nga mopalabang og ordinansa alang sa permamenteng truck ban sa maong mga oras.

Apan pabiling way labot sa truck ban ang mga delivery trucks nga nagkarga og isda, utanon ug ubang kargamentong daling malata o madaot. (BANAT NEWS)