Trak nga nagkarga og mga kabilya nalupyak, truck boy nadatugan

CEBU, Philippines - Usa ka truckboy ang nakaangkon og grabeng kadaot sa ulo ug lawas human mapisat ang atop sa delivery truck nga iyang gisakyan nga may kargang mga puthaw nga ihatud unta niini sa lungsod sa Consolacion kagahapon sa hapon diha sa may Maguikay flyover sa dakbayan sa Mandaue. Si Allan Pangandoyon, 36, taga barangay Mabolo sa siyudad sa Sugbu ang gidali sa pagdala sa St. Vincent Hospital sa dakbayan sa Sugbu human kini madatugi sa nalupyak nga atop ug mga kargang puthaw sa iyang trak.

Sa pakighinabi ni Edward Solijon, ang truck driver sa maong trak mibutyag nga 600 ka buok nga kabilyang adunay gidakon nga 16 mm ug gitason nga 12 metros sa usa ka construction site sa lungsod sa Liloan ang ilang karga. Apan tungod sa kabugat niini wala makadaog ang atop sa trak nga giyungyungan sa tumoy sa kabilyang gikarga sa luyo ug kalit nga nalupyak sa tunga hinungdan sa pagkapiit ni Pangandoyon.

Samtang nagsaka sa flyover nagpunay usab og bawogbawog ang kargang kabilya hangtud nga nakadungog na lang sila ug paka ug daling nakalihay hinungdan nga bunog lang sa bukton ang naangkon ni Solijon. Apan si Pangandoyon nga natungan sa drayber ug laing truckboy nga si Domingo Magsukay maoy nagrabehan sanglit wala man kini kalihayan. Inabagan sa mga tawo nahulbot nila si Magsukay ug nadala sa tambalanan. (BANATNEWS)