Sa kasaysayan karon

September 11

Terror Attack

2001— Karong adlawa gihinumdom sa Estados Unidos ug sa tibuok kalibutan ang labing bangis nga pag-atake sa mga terorista diha mismo sa ilang nasud nga nahitabo niadtong September 11, 2001. Ang pag-atake nga sa kadugayan nasutang binuhatan sa Al Qaedah Terror Group pinangulohan ni Osama bin Laden mikalas og dul-an 3,000 ka tawo. Ang pag-atake maayong pagkaplano ug may koordinasyon sa mga terorista nga gilangkuban og 19 ka mga teroristang mi-hijack sa upat ka mga passenger jets. Ang target mao ang New York City ug Washington D.C. diin maglingkod ang gobiyerno ug financial institutions sa Amerika. Ang mga terorista mi-hijack ug mi-pilot gyud sa duha ka mga passenger jets nga mao ang American Airlines Flight 11 ug United Airlines Flight 175 ug gituyo og bangga sa twin towers sa World Trade Center complex sa New York; duha ka oras human sa hitabo nahagsa ang duha ka tower ug natabunan hasta ang mga rescuers. Samtang ang American Airlines Flight 11 gituyo og tibugsok sa mga terorista sa Pentagon, ang command center sa tanang pwersa militar sa Amerika nga nahimutang sa Arlington, Virginia. Ang ikaupat nga passenger jet nga United Airlines Flight 93 nga buot untang ibangga sa mga terorista diha sa United States Capitol Building sa Washington nahagsa sa usa ka lapad nga umahan. Kini dihang misukol ang mga pasahero ug misuway sa pag-ilog sa kontrol gikan sa mga terorista sa maong abyon. Ang September 11 attack nga gitawag usab og “911” attack maoy nakapausab sa polisiya sa Estados Unidos ug mga kaalyadong nasud niini may labot sa terorismo, ang maong hitabo nakapausab sa sitwasyon ug panglantaw sa mga security forces sa tibuok kalibutan kun hisgutan na ang terorismo.

Naigo sa kilat

1997—Napulo ug siyam (19) ka tawo ang nakalas ug unom ang nangaangol sa pag-igo sa kilat sa probinsya sa Andhra Pradesh, sa nasud sa India.