Prutas ug utanon maoy angay itanom

CEBU, Philippines - Ang pagpananom og prutas ug mga utanon angay nga idekorasyon sa mga sidewalk ug sa taliwa sa kadalanan ning siyudad ilabi na sa Osmeña Boulevard.

Mao kini ang gibutyag ni kanhi konsehal Nestor Archival sa iyang pakig-atubang sa mga sakop sa media atol sa Tapok-Tapok sa Sugbo sa miaging buntag.

Matud ni Archival nga sa kahimtang karon nga pulos mga kahoy  nga lasangnon ug mga misitas ang nanubo sa kadaplinan   sa karsada ug sa center lane niini, kuwang kaayo sa kahulogan ang maong mga tanom.

Miingon siya nga alang kaniya kun siya maoy magbuot, mga nangka maoy angay patuboon sa mga sidewalk samtang sa center lane mga kamunggay, agbate , tangkong, ug uban pa maoy ipananom sa taliwa.

Sa pagkakaron ang gipananom sa center lane sa Osmeña Boulevard mao ang mga bombil ug uban pang tanom nga way kapuslanan sa lawas sa tawo. Hinuon di kalikayan nga mosiaw gyud ang kawatan kun makita nila nga mamunga na ang mga nangka ug labong na ang kamunggay ug uban pang mga utanon.

Apan matud pa ni Archival nga pasagdan ang maong mga tanom nga kuninitan sa mga kawatan kay alang man sa ilang lawas ug dili angay maguol ang gobiyerno.

Matud pa niya nga ang tawong kawatan may higayon nga makahinulsol ilabi na kun sa iyang pagkaon sa iyang kinawat sakitan og tiyan o kaha magtinga na. 

Kun magduda siya nga gigabaan siya gumikan sa iyang pagkakawatan, mahimong moundang kini sa pagpangawat kay mahadlok nga mamatay siya sa gaba. 

Apan miingon si Archival nga dili angay kabalak-an kun punayan og kawat ang  mga tanom nga mapuslanon kay katungdanan man usab sa gobiyerno nga makapakaon kini sa katawhan