CEBU, Philippines - Patay ang usa ka giingong “karton girl” human kini madat-ugi sa container van diin siya mipasilong samtang nagpaabot kanus-a mohunong ang kusog nga uwan niadtong Sabado sa gabii sa compound sa Cebu Ace Trucking Corporation nga nahimutang sa F.F. Cruz, North Reclamation Area, Mandaue City.
Ang 28-anyos nga babayeng taga lungsod sa Cordova (pangalan gipugngan sa Banat News aron di madugangan ang kasakit sa pamilya), giingong mituyo og ngadto sa Mandaue aron unta sa pagpangita og customer apan namatay kini dihang naipit sa container van.
Ang “karton girl” maoy gibansag sa mga babayeng giingong mobaligya og kalipay sa mga motorista ilabi na sa mga drayber sa mga dagkong trak diha sa North Reclamation Area nga kaniadto pa gisigehan og ronda sa kapolisan.
Matud ni PO2 Victor Atto Jr, sa Investigation and Detective Management Branch sa Mandaue City Police Office nga wala mabantayi sa babaye ang metal stands sa container van nga nag-anam na og kalubong sa yuta gumikan sa sige og uwan hangtud nga nalusbo kini ngadto niya.
Nakapangayo pa unta kini og tabang sa duha ka truck boy sa Alrey Cargo Forwarding nga sila si Wendel Flores, 22, ug Miguelito Rosal, 20, taga Mandaue City nga diha ra usab duol sa lugar.
Apan gumikan sa kabug-at sa container van nga adunay sulod wala na nila matabang ang biktima ug dali nalang mitawag sa kapulisan.
“Nalukot na pag-abot namo kay nagtungko man na siya sa ilawom,” matud ni Atto.
Daling mitawag sa mga taga-Emergency Rescue Unit Foundation (ERUF) ang kapulisan nga maoy nideklarar nga patay na ang biktima pipila ka minuto na ang nakalabay.
Nagpatabang pa sa trucking company ang kapulisan aron mogamit og crane aron makuha ang container van ug maugkat ang lawas sa biktima.
Nilanat og usa ka oras ang gihimong retrieval operation sa sakop sa ERUF ug kapulisan una pa nakuha ang lawas niini.
“Nanglagom na ang lawas di na gyud madala,” matud ni Atto. Siya midugang nga dili interesado ang pamilya sa biktima nga mopasaka og kaso batok sa trucking company apan mangayo lang sila og tabang financial sa pagpahiluna sa patay’ng lawas niini. (BANAT NEWS)