Sa Kasaysayan Karon Septiyembre 9

Sergio Osmeña

1878— Gipanganak ang Sugboanong nahimong ikaupat nga Presidente sa Pilipinas nga si Sergio Osmeña sa Cebu City. Si Sergio Osmeña y Suico usa ka Filipino-Chinese maoy bise presidente ug mipuli sa iyang classmate sa kolehiyo nga si Presidente Manuel L. Quezon kinsa namatay didto sa Estados Unidos atol sa giyera sa Ikaduhang Kalibutanong Gubat. Si Osmeña milingkod isip presidente sa Pilipinas gikan 1944 hangtud 1946, siya usab ang labing edaran nga milingkod isip presidente sa nasud sa edad nga 65. Ang Nacionalista Party gitukod ni Osmeña sa iyang panahon. Nahimong gobernador sa Sugbu si Osmeña gikan 1901 hangtud 1907, nahimong Speaker of the House gikan 1907 hangtud 1922 ug nahimong senador sulod sa 13 ka tuig ug maoy Senate President pro tempore. Midaog pagka-bise presidente pares ni Quezon niadtong 1935 ug na-reelect ang duha niadtong 1941 sa pagsugod sa gubat. Siya ang amahan ni kanhi senador Sergio Osmeña Jr., apohan nila kanhi senador Sergio Osmeña III ug John Henry Osmeña, kanhi gobernador Lito Osmeña ug kanhi Cebu City mayor Tomas Osmeña kinsa representante na sa south district sa Cebu.

Computer bug

1945 – Motuo ba mo nga ang gikabalak-an kaniadtong makaguba daw sa mga computer software programs nga gitawag og “computer bug” ug “millennium bug” nakuha gyud ang pangalan gikan sa usa ka insekto nga ‘bug’ sama sa tiyangaw? Samtang nagsumada ang laboratoryo sa Harvard University sa US gamit ang Mark II computer kalit kining mikaging ug dili mogana. Dihang giablihan nakit-an sa sulod sa computer ang usa ka ‘tiyangaw’ nga insekto nga namatay didto ug mikaging tungod siguro sa kainit o ba kaha nakuryentihan. Usa sa mga faculty ang mikuha niini ug gipilit gyud niya kini sa ilang logbook gamit ang tape aron maoy ipakitang ebidensyang nakaingon sa problema sa ilang operasyon. Karong mga panahona, kung dunay problema ang mga computer sagad dudahan sa mga technicians computer bug o ba kaha virus ang hinungdan.