Taga Moalboal nagpa-membro sa One Cebu

CEBU, Philippines - Dili mominus 6 mil ka tawo sa lungsod sa Moalboal ang misaksi sa pagpa-membro sa mga opisyal sa Moalboal sa One Cebu Political Party nga gipangulohan ni Gobernador Gwendolyn Garcia.

Ang nanumpa gipangunahan nila ni Mayor Inocentes “Titing” Cabaron; Vice Mayor Nelson Abinido ug ang mga konsehal niini, lakip na ang 15 ka mga kapitan sa barangay nga gipangulohan sa ilang ABC President nga si Susana Nuevo, ingon man usab ang mga household leader; day care worker; ug mga kahugpongan sa kababayen-an sa mga nagkadaiyang barangay sa maong lungsod.

Atol sa maong kalihokan gipalanog ni Mayor Cabaron ang ilang dakong tinguha sa pagpaluyo sa kadagkuan sa maong partido nga gipangulohan ni Gobernador Garcia kinsa mokandidato sa pagka-senador, Cong. PJ Garcia sa pagka-gobernador, kanhi Danao City Vice Mayor Boboy Durano sa pagka-bise gobernador ug uban pa.

Atol sa pakigpulong ni Cebu 3rd District Cong. Pablo PJ Garcia ug ni Boboy Durano naglukso-lukso sa kalipay ang taga Moalboal dihang gisaaran sila nga hatagan og dugang pangkalamboan ang ilang lungsod.

Samtang gipalanog usab ni Cebu 2nd District Representative ug Deputy Speaker Pablo “Pabling” Paras Garcia nga puwerte usab niyang lipaya sa nakita niyang bagang duot sa katawhan nga mitambong sa maong kalihokan.

Human sa maong pakigpulong gisunod dayon ang mass oath-taking o tiningob nga pagpanumpa sa mga mitipon sa One Cebu nga gidumala sa gobernador.

Dayon mihatag ang gobernador og mensahe nga nagpasabot nga ang pagpili sa katawhan sa mga kandidato sa One Cebu Party nagkahulogan sa dugang kauswagan sa ilang lugar. (BANAT NEWS)