Mercado gi-snub sa mga vendor

CEBU, Philippines - Gibutyag sa hepe sa Garbo Asenso Sumbanan Alyansa (GASA) sa Cebu City Hall nga si Dr. Lucille Mercado nga hangtud karon dili pa gayud moatubang kaniya ang mga street vendor sa palibot sa Fuente Osmeña busa gipadayon nila ang clearing operation sa maong dapit.

Matud pa ni Mercado nga nakigtambayayong siya karon sa Prevention, Restoration, Order Beautification Enhancement (PROBE) sa pag-monitor sa maong dapit aron dili na matukoran og balik sa mga stall.

Sumala pa niya nga makadaghan na siya magpadala og suwat sa maong mga sidewalk vendor aron makigtagbo siya kanila apan wala pa gyud siya atubanga niini. Dugang pa niya nga tumong unta sa maong programa nga ibalhin   ang 10 ka mga sidewalk vendor nga apektado sa maong clearing operation ngadto sa merkado sa Ramos.

Nasayran nga ang pagpabalhin sa mga stall sa mga street vendor nga nahimutang duol sa Fuente Osmeña maoy kabahin   sa beautification program sa siyudad. Giingong ang mga beauty spot sa siyudad sa Sugbo patahomon aron hangpon sa mga umaabot nga bisita ning dakbayan .

Matud pa niya nga importante kaayo ang clearing operation sa maong dapit aron makasugod na sila sa pagpaanindot niini ug gipanghinaot niya nga   mokooperar ang hingtungdang mga sidewalk vendor.

Nagkanayon si Mercado nga dili gusto ang siyudad nga mawad-an og panginabuhian ang maong mga vendor hinungdan nga ibalhin sila ngadto sa Ramos Market. (BANAT NEWS)