Tag-iya og drug den nadakpan

CEBU, Philippines - Nadakpan sa pagpangronda sa kapulisan ang gitumbok nga notadong drug pusher nga mihimo pa og suyopanan alang sa iyang mga kostumer diha sa iyang balay sa barangay South Poblacion siyudad sa Naga kagahapon sa alas 7:00 sa buntag.

Ang nadakpan mao si Alfie Cañete Alberto,32, nagpuyo sa maong lugar nakuhaan og mga drug paraphernalia, duha ka dagkong paketeng may sulod nga gidudahang shabu ug mga gagmay’ng pakete nga dunay mga lama sa gituohang shabu.

Ang pagpangronda pinasubay sa search warrant nga giluwatan ni RTC-7 Branch 17 Judge Silvestre Maamo Jr. batok sa suspek tungod sa report nga namaligya kini og ilegal nga drugas sa maong dapit.

Matud ni PO2 Rongie Nadora sa Naga City Police Station dihang nahinabi sa Banat News gidungog na ang suspek sa maong lugar.

Dugang pa ni Nadora dunay mga kostumer nga nanuyop ang suspek sa iyang balay nianang pagronda apan daling nakaipsot apan nadakpan si Alberto kinsa mag-atubang og kasong kalapasan sa RA 9165. (BANAT NEWS)