Sa Kasaysayan Karon

Septiyembre 8

Alyansa sa SEATO

1954— Naestablisar ang Southeast Asia Treaty Organization (SEATO) nga gihimo sa Manila. Ang SEATO gilangkuban sa nasud sa United States (US), Australia, France, Great Britain, New Zealand, Philippines, Pakistan ug Thailand nga susama og mutual defense treaty. Gitawag usab kini kaniadto og Manila Pact. Tuyo sa maong mga nasud nga mapanalipdan ang mga nasud sa South East Asia nga dili masudlan sa impluwensya sa komunismo gikan sa China ug USSR. Apan gumikan sa wala pagkasinabtanay sa mga miyembrong nasud ilabi na sa pag-ulbo sa Vietnam War nabungkag ang SEATO niadtong 1977, lima ka tuig human modaog ang mga komunista sa Vietnam War ug nauwawan ang US.

Miako sa Japanese War Crimes

1945— Sa katuyoang dili mauwawan ug magpabilin ang dungog niini, misuway sa pag- “hara kiri” si Hideki Tojo, ang Primero Ministro sa Japan niadtong pag-ulbo sa Ikaduhang Kalibutanong Gubat nga miresulta sa kapildihan sa Japan. Ang pagpusil ni Tojo sa iyang kasingkasing nahitabo Septiyembre 8, 1945 diha mismo sa iyang balay sa Setagaya samtang gialirungan sa mga sundalong Amerkano aron unta kini arestuhon. Apan bisan pa man gimarkahan og uling sa usa ka doktor ang iyang dughan tumong sa iyang kasingkasing daw milikay ang bala sa maong bahin sa lawas. Nadisarmahan si Tojo ug gidala sa tambalanan, pakyas ang iyang paghikog. Usa siya sa gipasakaan og kasong War Crimes sa International Military Tribunal for the Far East ug gisentensyahan og bitay niadtong Nobiyembre 12, 1948. Ang pagbitay gihimo niadtong Disyembre 23, 1948. Si Tojo miako sa responsibilidad sa mga nahimo sa Japan ug sa iyang katapusang mga pamahayag siya misuporta sa hukom ug sa hustisya alang sa mga biktima, ug mihangyo sa Amerika nga kaluy-an ang mga Hapones nga nabiktima usab sa duha ka gipabutong atomic bombs sa Amerika didto sa Hiroshima ug Nagasaki.