CEBU, Philippines - Gi-inspeksyon ni Gobernador Gwendolyn Garcia ug Cebu Third District Representative Pablo John PJ Garcia sa miaging adlaw ang P50 milyones nga Balamban Provincial Hospital.
Kauban usab nila sila si Board Member Alex Binghay ug Ian Zambo, Balamban Mayor Ace Binghay ug Vice Mayor Rose Binghay, mga staff sa Integrated Provincial Health Office ug Balamban Chief of Hospital Dr. Lorna Desiree Gonzalez.
Gihangop ni Dr. Gonzalez ang katukoran sa nahisgutang tambalanan nga may tulo ka andana ug may 100 ka katre.
Gumikan niini modugang pa og mga doctor ug mga nurse ang kagamhanan sa lalawigan aron idestino sa maong tambalanan.
Human sa pag-inspeksyon sa maong edipisyo, mibisita usab ang gobernador sa PEDIA WARD sa maong hospital.
Usa sa mga pasyente mao ang usa ka tuig nga batang taga Matab-ang, Toledo City nga naghambin sa congenital heart defect.
Si Congressman PJ mipasalig nga mohatag og hinabang sa maong bata aron kini ma-operahan sa Vicente Sotto Memorial Medical Center sa labing dali nga panahon, butang nga gipasalamatan sa inahan sa bata. (BANAT NEWS)