Kasaulogan sa Civil Service

CEBU, Philippines - Ang pagpalambo sa espiritu sa pagkabayani sa natad sa panerbisyo sibil maoy unod sa mensahe sa mga lider sa Civil Service Commission (CSC)7 sa ilang pagtamud sa ika-112 nga kasaulogan sa Philippine Service Month,ning buwan sa Septembre.

Matud pa ni Regional Director Judith D. Chicano sa CSC 7 nga gikinahanglan kaayo sa mga kawani sa gobiyerno nga dili mopakyas sa gilauman sa katawhan sa ilang serbisyo ngadto sa publiko.

Si Chicano nagkanayon nga isip suloguon sa katawhan ang matag usa kinahanglang maghupot og bayanihong pamatasan sa natad sa panerbisyo sa publiko ug sa nasud kay mao kini ang tumong nga kab-oton sa usa ka sibilyang nag-alagad sa kagamhanan.

Matud pa ni Chicano nga gusto niyang makabaton og epekto ang mahinungdanong tahas sa usa ka sibilyang suloguon alang sa kaayohan sa katawhan pinaagi sa maayong abilidad ug katakus sa panerbisyo.

Sa samang higayon gusto usab niyang ang nangalagad sa gobiyerno   malipayon, malinawon ang hunahuna ug kanunay nga positibo ang panglantaw sa iyang mga gimbuhaton aron makita ang iyang maayong pamatasan isip suloguon sa kagamhanan alang sa katawhan.

Atol sa bag-ohay pa lang gilusad nga mga seremonyas sa pagbukas sa   Philippine Civil Service Month ug sa ika-18 nga National Crime Prevention Week gisaysay ni Chicano nga kinahanglang matag usa ka alagad sa goberno may panglantaw sa maayong kaugmaon niya sa panerbisyo ngadto sa katawhan.

May tema kini nga “Kawani ikaw ay Isang Lingkod Bayan” samtang ang National Crime Prevention Week naghupot usab sa tema nga “Sa Crime Prevention May Magagawa ako.” (BANAT NEWS)