200 ka helmet narehistro sa Talisay

CEBU, Philippines - Wala panumbalinga sa ubang mga motorista ang pagbundak sa kusog nga uwan kagahapon sa dakong tinguha nila nga makaparehistro sa ilang helmet ug napapitlan og sticker   didto sa dakbayan sa Talisay.

Si Gerard Lariego sa City of Talisay Traffic Operation Development Authority (CT-TODA) nga nahinabi sa Banat News mibutyag nga ang CT-TODA ug ang buhatan ni Bise Mayor Alan Bucao maoy mitabang sa mga kawani sa Department of Trade and Industry (DTI) sa pag-inspection ug pagbutang og sticker sa mga helmet nga nakapasar.

Ang maong kalihukan gipahigayon kagahapon sa alas 8:45 sa buntag didto sa Talisay Tourist Complex sa barangay Tabunok ug nahuman sa pagka-alas 4:00 sa hapon .

Matud ni Lariego nga mikapin sa 200 ka mga motorista ang nagpa-inspection sa ilang mga helmet diin 70 porsyento niini Talisaynon. Ang ubang nagparehistro naggikan sa dakbayan sa Toledo ug lungsod sa Minglanilla. Gibutyag ni Lariego nga sa maong gidaghanon 90 porsyento ang nakapasar og napapitlan og ICC sticker.

Ang kasagarang mipasar nga mga helmet mao ang brand nga “Index”. Matud pa ni Lariego nga kung wala pa mobunok ang uwan posibleng mosobra pa sa 500 ka mga motorista ang magparehistro sa ilang helmet. Sayo niini si Bucao kinsa maoy chairman sa CT-TODA mipalabang og resolusyon nga nag-awhag kang DTI Provincial Director Nelia Navarro sa pagpahigayon og rehistrasyon sa mga helmet didto sa Talisay aron makatabang sila sa ubang motorista .

Si Lariego midugang nga posible nga ang ubang motorista mohangyo sa bise mayor sa paglugway pa og dugang adlaw sa maong rehistrasyon sa mga helmet. (BANAT NEWS)