CEBU, Philippines - Hingpit na nga gipirmahan nila ni Governor Gwendolyn Garcia ug Chief Executive Officer Pedro Palomino sa CEMEX Philippines ang memorandum of agreement (MOA) bahin sa kasabotan nga ang Cemex maoy mopalit sa abo sa carbon gikan sa planta sa Kepco-Salcon Power Corporation (SPC).
Ang pagpinirmahay gisaksihan mismo sa Vice President sa Kepco- SPC Jong Woo Moon ug sa corporate lawyer sa nahisgutang power corporation nga si manlalaban Guillermo Dabbay Jr, Provincial Legal Officer Marino Martinquilla ug sa abogada sa Cemex Philippines.
Matud pa ni Martinquilla nga sa maong kasabotan mokita ang lalawigan sa Sugbo og P40 matag metriko tonelada sa maong abo gikan sa bayad sa Cemex ug laing usa ka dolyar gikan sa Kepco SPC.
Gipasabot usab sa gobernador nga ang Kepco-SPC na mismo ang mohatud sa maong mga abo ngadto sa CEMEX.
Ang maong kalambuan gikalipay kaayo ni Palomino kinsa mipadayag nga usa kini ka ehemplo sa maayong public ug private partnership.
Subay niini gipaabot ni Dabbay nga kasugdan na ang pagpanghatud sa maong abo ngadto sa Cemex human luwati sa environmental court ang katugotan sa paglabay sa coal ash.
Sa nasayran gibanabanang mohatag og tag 600 metriko tonelada nga fly ash ug 300 metriko tonelada sa bed ash ang Kepco matag bulan, apan bisan kun mosubra sa kontrata modawat gihapon ang Cemex
Subay niini gipaabot sa gobernador nga makabaton og dugang kita ang lalawigan sa Sugbo. (BANAT NEWS)