Nasukong gipamulta balay gisunog

CEBU, Philippines - Gisunog sa 26-anyos nga ulitawo ang pinuy-anan sa iyang silingan tungod sa kasuko nga gipabayad sa kanding nga iyang gihapak og bato ug namatay dihang iyang naabtang gikaon ang iyang mga tanom sa bukirang bahin sa barangay Mabunaw lungsod sa Tabuelan niadtong Huwebes sa alas 11:00 sa buntag.

Ang suspek nga boluntaryong mitahan sa kapulisan human sa hitabo mao si Jason Argel, nagpuyo sa barangay Mabunaw sa maong lungsod. Ang tag-iya sa pinuy-anan nga naugdaw mao si Jaime Arellano, 39, nagpuyo sab sa maong dapit.

Matud ni FO3 Dario Bravo, fire investigator sa Tabuelan Fire Station dihang nahinabi sa Banat News, ang suspek mao pay nag-una sa biktima nga mitahan sa kapulisan alas 12:00 pasado sa udto, ang tag-iya sa panimalay alas-2 na sa hapon midangop sa kapolisan ug diha na sa karsel ang suspek.

Matud ni Bravo gihusay na ang suspek ug reklamante diha sa barangay pipila ka adlaw na ang milabay mahitungod sa kanding ni Arellano ug nagkasabot nga bayran og P4,450 ang maong hayop. Apan nahibulong na lang sila nga gisunog na sa suspek ang balay sa reklamante ug ugdaw na kini dihang naabtan ni Arellano ug nag-una pa kaniya ang suspek didto sa presinto.

Samtang matud ni PO1 Regie Pescante sa Tabuelan Police nga karung Lunes pa nila ipasaka ang kaso batok sa suspek nga nagtingkagol na karun sa karsel tungod kay gikompleto pa nila ang mga ebidensiya. (BANAT NEWS)