2 tinun-an nakuhaa'g MJ sa checkpoint

CEBU, Philippines - Duha ka mga batan-ong lalaking tinun-an sa high school apil ini ang 15- anyos ang gidakop atol sa checkpoint sa kapulisan human masakpi nga nagdala og dul-an usa ka gatos ka sticks nga Marijuana sa barangay Liong lungsod sa Dumanjug niadtong Huwebes sa alas 12:45 sa udto.

Ang nadakpan nga mga tinun-an mao ang nagmaneho sa motorsiklo nga si Rondel Morales,20, ug tinun-an sa 2nd year high school sa Bitoon National High School ug ang 15-anyos nga classmate.

Upat ka kaha sa sigarilyo nga pulos puno og linikit nga Marijuana nga moabot og 60 ka sticks ang nasakiyo gikan sa duha.

Matod ni SPO1 Josellito Abella sa Dumanjug Police dihang nahinabi sa Banat News ang mga suspek paingon sa lungsod sa Ronda dihang ilang gipara sa checkpoint, giingong diha sa U-Box nakuha ang usa ka kahang Marijuana, usa kang Morales ug duha ka kaha sa 15-anyos.

Gituohan nga gikan sa eskuwelahan ang maong mga tinun-an ug migawas sa paniudto. Ang duha gidala sa buhatan sa kapulisan ug gihikay na ang kasong ipasaka batok kanila. (BANAT NEWS)