63-anyos gitabanga'g puspos

CEBU, Philippines - Patay diha-diha ang 63-anyos nga lolong giingong ex-convict nga gihulagway nga arogante ilabi na kun mahubog human gitabangan og puspos og kahoy sa ulo sa magsuong iyang gikainom ug gikaaway sa barangay Basak lungsod sa Badian niadtong Huwebes sa alas 11:45 sa gabii.

Ang biktima nga patay dihadiha tungod sa mga bun-og ug samad sa ulo tungod sa pagpuspos mao si Balveno Seldura, nagpuyo sa maong lugar ug usa ka ex-convict.

Samtang ang gitumbok nga nagtinabangay pagpatay kang Seldura mao ang magsuong Bonifacio Jurillo, 25, ug ang manghod niining si Rogello Jurillo, 23, pulos nagpuyo sa maong lugar.

Matud ni PO1 Edmundo Sala sa Badian Police Station dihang nahinabi sa Banat News nakit-an pa ang tulo nga nag-inom og tuba sa sayong gabii apan nagkalalis ang biktima ug ang magsuon hangtud nga nananghid ang biktima nga mouna na lang og pauli.

Apan samtang nagsusapinday pauli sa ilaha wala makabantay ang biktima nga nag-una na kaniya ang duha ka suspek diha sa iyang pinuy-anan ug nag-atang, dihang nangabli na sa pultahan si Seldura gikatahong kalit nga giatake sa magsuon ang biktima.

Gikatahong bisan nahagba na ang biktima tungod sa kahubog ug pangidarun niini gisigehan gihapon kini og puspos sa ulo ug agtang sa mga suspek hinungdan sa hinanali niining kamatayon.

Ang mga silingan mao nay mipahibalo sa kapolisan kabahin sa nahitabo apan ang mga suspek nakapalayo na.

Hinoon pagka alas 5:00 sa buntag kagahapon boluntaryong mitahan ang mga suspek sa buhatan sa kapulisan.

Dugang nahipos nga impormasyon sa kapulisan nga si Seldura nabilanggo kaniadto sa National Bilibid Prison sa Muntinlupa tungod sa kasong murder, giingong hambugerohon usab kini kun makainom.( /EIM)(BANAT NEWS)