'Police Car' Suya lang siya - Kong. Osmeña

CEBU, Philippines – Mihagit si Kongresista Tomas Osmeña ngadto sa iyang mga kritiko nga pasakaan siya og kaso kung dunay mokuwestiyon kalabot sa opisyal nga selyo nga nakatatak sa duha ka mga sakyanan nga gidonar sa Bigfoot Global Solutions ngadto sa iyang igsuon nga si Maria Victoria “Minnie” Osmeña, ug sa anak niini nga si Paulo.

Sumala pa sa kongresista nga dili isyu ang maong logo nga nakatatak sa sakyanan. Nagkanayon si Osmeña nga wala siya kita og unod sa balaod nga magsilot kung magbutang selyo sa gobiyerno sa pribadong sakyanan.

Kahinumduman nga nahimong isyu ang maong mga sakyanan sanglit matud pa idonar unta kini sa Bigfoot ngadto sa kagamhanan sa siyudad sa Sugbo aron maoy magsilbing patrol car sa South Road Properties.

Apan si Osmeña miklaro nga nakapangalan ang maong mga sakyanan ngadto kang Minnie ug Paulo ug dili sa siyudad sa Sugbo.

Gisaysay niya nga gihimong police car ang maong mga sakyanan sa mga pelikula nga gihimo sa Bigfoot. Ug atol sa pagdonar sa maong mga sakyanan, mahimo siya nga makagamit niini ug gipabutangan usab niya kini og tinuod nga polis kung moparada kini sa mga kadalanan.

“Suya lang siya,” hirit pa ni Osmeña kinsa tataw nga iyang gipasabot ang init niya nga kaaway karon sa politika nga si Mayor Michael Rama.

Apan sa report sa Balitang Bisdak kagahapon, si Rama miingon nga dili siya buot mokomento sa maong isyu.

Kahinumduman nga sa dihang napili si Rama pagka-mayor niadtong 2010, giingong nangita ang mga kaalyado niini sa maong mga sakyanan.

Apan nasurpresa na lang ang kampo ni Rama sa dihang nakit-an nila ang maong mga sakyanan nga dunay selyo sa siyudad nga gigamit ni Osmeña sa nagkadaiyang kalihukan nga gitambongan niini. (EIM) BANAT NEWS