Tinun-an sa SIT tabangan sa Kapitolyo

CEBU, Philippines – Tabangan ni Gob. Gwendolyn Garcia ang mga tinun-an sa lungsod sa Madridejos kinsa giingong gipaundang pagpatungha sa ilang tunghaan gumikan sa pag-apil isip magsasayaw sa niaging Pasigarbo sa        Sugbo.

Nakigtagbo si Madridejos Mayor Salvador dela Fuente kang Garcia kagahapon sa Kapitolyo aron ipadangat ang maong problema. Ang mga apektadong tinun-an sa sangang tunghaan sa Salazar Colleges of Science and Institute of Technology sa lungsod sa Madridejos nidangop na sa Commission on Higher Education mahitungod sa ilang gidangatan.

Samtang ang kadagkoan sa maong tunghaan ang mibahad usab nga mopasaka og kaso sa buhatan sa Ombudsman-Visayas batok sa mga opisyal sa lungsod gumikan sa pagpaapil sa 26 nila ka mga tinun-an sa Pasigarbo sa Sugbo Festival nga way pagtugot sa tunghaan.

Karong Lunes, ipatawag ni Garcia ang kadagkoan sa CHED aron tukion ang kahimtang sa mga tinun-an.

Si dela Fuente mipadayag sa kaandam pag-atubang sa kasong ipasaka sa presidente sa SCSIT nga si Dr. Doroteo Salazar.

“Iya nang katungod. Andam ang LGU pagtubag unsa man iya allegations,” matud pang dela Fuente kinsa miklarong ilang gipananghiran pinaagi sa suwat ang administrador sa tunghaan nga si Bisaya Tayo. (EIM) BANAT NEWS